Shugaba Tinubu Ya Dawo Daga Taron G20 CwA A Kasar Jamus

Shugaba Bola Ahmed Tinubu ya dawo Najeriya bayan halartar taron G20 Compact with Africa (CwA) wanda Shugaban Gwamnatin Jamus Olaf Scholz ya shirya.

Jirgin Shugaban Kasar ya sauka a filin jirgin saman Nnamdi Azikwe da karfe 8 na daren ranar Laraba kuma ministan babban birnin tarayya, Nyesom Wike ya tarbe shi; Shugaban jam’iyyar APC, Abdullahi Ganduje; da kuma shugaban ma’aikatan fadar shugaban kasa, Femi Gbajabiamila.

President @officialABAT returns after participation at the G20 Compact with Africa Economic Conference in Berlin, Germany#PBAT pic.twitter.com/5imPqPPr4Y

— Presidency Nigeria (@NGRPresident) November 22, 2023

A safiyar Lahadi ne shugaba Tinubu ya bar Abuja zuwa birnin Berlin, inda aka gudanar da taron G20 CWA a lokaci guda tare da taron kasuwanci na Najeriya karo na 10 na Jamus a otal din JW Marriott.

A yayin taron, shugaban na Najeriya ya bi sahun sauran shugabannin kasashe mambobin kungiyar ta CwA, da abokan huldar kasuwanci, da kuma shugabannin kungiyoyin kasa da kasa da kuma tattauna dabarun inganta hadin gwiwar tattalin arziki da kasuwanci a Najeriya.

A yayin taron kasuwanci na Jamus, Najeriya ta kulla yarjejeniyoyin fahimta guda biyu da Jamus: daya na ayyukan sabunta makamashi na dala miliyan 500, daya kuma na isar gas daga Najeriya zuwa Jamus.

Har ila yau, yayin taron G20 CWA, Jamus ta bayyana shirinta na zuba hannun jari a ayyukan gina layin dogo na Najeriya, ta yadda za ta himmatu ga sha’awar kamfanin nan na kasar Jamus, Siemens, na sake yin wani aikin layin dogo mai sauri a Najeriya.

A wajen taron, shugaban Najeriyar ya bayyana ‘yan Najeriya a matsayin masu ilimi, ƙwararru, da ƙwazo, kadara mafi daraja da ke ba da gasa a gasar duniya na sabbin saka hannun jari.