Hukumar Kula da ‘Yan Gudun Jijira da Bakin Haure ta Kasa ta ce an kammala shirin kwashe ‘yan gudun hijirar da ke zaune a kasashen Kamaru, Chadi da Jamhuriyar Nijar zuwa al’ummomin jihar Borno shekaru da dama bayan da mayakan Boko Haram suka kakkabe su daga gidajen kakanninsu.
Kwamishinan tarayya Aliyu Tijjani Ahmed ne ya bayyana hakan a lokacin da ya kai ziyara wani birnin tauraron dan adam da aka gina wa ‘yan gudun hijirar rikicin Boko Haram a Marua da ke karamar hukumar Mafa a jihar Borno.
“Mun tattauna kan batun kwashe ‘yan gudun hijirar mu daga Kamaru, Nijar da Chadi kuma an amince da cewa za a yi taron bangarori uku kuma hukumar za ta koma ofis.
“Za mu zauna don samar da matakai da hanyoyin da za mu yi amfani da su wajen kwashe mutanenmu da ke zaune a Kamaru, Nijar da Chadi. Hukumar da gwamnatin jihar Borno da kuma UNCHR za su gudanar da wannan aiki,” in ji Ahmed.
Ya ce za a samar da irin wadannan garuruwan tauraron dan adam da ke da hanyoyin dogaro da kai a fadin kasar domin sake tsugunar da ‘yan gudun hijira.
Da ya ziyarci sansanin ‘yan gudun hijira na Muna dake karamar hukumar Jere, kwamishinan tarayya na NCRMI ya bayar da tallafin kayan abinci, da sauran kayayyakin agaji ga gidaje dari biyar da suka hada da wadanda gobara ta shafa a sansanin.
Bayan haka, kwamishinan na tarayya ya ziyarci cibiyoyin koyon sana’o’i da aka kafa wa ‘yan gudun hijira da kuma birnin tauraron dan adam a Marua, inda ya yi alkawarin fara sake tsugunar da jama’a a cikin kwata na farko na shekarar 2024.
