FIFA Tana Aiki Da Hukumar Kwallon Kafa Ta Indonesiya Don Ta Kafa Hukumar Bincike

Hukumar kwallon kafa ta Indonesiya tare da hukumar kwallon kafa ta duniya, FIFA za ta kafa wata rundunar hadin gwiwa a wani yunkuri na ci gaba da daukar matakan kare jama’a, bayan wani mummunan  kwallon kafa a farkon wannan watan.

Hukumomin Indonesiya na fuskantar matsin lamba da su dauki tsauraran matakai don inganta matakan kare lafiyar kwallon kafa bayan mutuwar mutane sama da 130 a yayin dandazon jama’a a wani wasa, a filin wasa na Kanjuruhan da ke Gabashin Java a ranar 1 ga Oktoba.

Masana harkokin tsaro sun ce hukumar ta FIFA ta haramta harba hayaki mai sa hawaye da ‘yan sanda suka yi a cikin filin wasan, wanda ya janyo hasarar rayuka.

Shugaban PSSI, Mochamad Iriawan, ya shaida wa manema labarai cewa, “Mun amince da kafa wata runduna ta aiki, ko kuma ta kawo sauyi a wasan kwallon kafa, wanda ya kunshi gwamnati, FIFA, da kwararru a harkar kwallon kafa, tsaro, da filayen wasanni,” in ji shugaban PSSI, Mochamad Iriawan, bayan ganawa da jami’an FIFA.

“A karkashin tsare-tsaren, ‘yan sandan Indonesiya za su tabbatar da cewa an daidaita  hanyoyin gudanar da ayyukansu da dokokin FIFA,” in ji shi.

Shugaban kasar Indonesiya Joko Widodo, wanda aka fi sani da Jokowi, ya ce FIFA ba ta shirya sanyawa kasarsa takunkumi kan wannan lamari ba, amma ba kasafai hukumar wasanni ta shiga tsakani ba, a daidai lokacin da kasar Indonesiya za ta karbi bakuncin gasar cin kofin duniya na ‘yan kasa da shekaru 20 a shekara mai zuwa.