Wata kotu a Sudan ta wanke makusantan tsohon shugaban kasar Omar al-Bashir. Tsofaffin jami'ai 13 ana tuhumar su ne da laifin kitsa yunkurin juyin mulkin da aka fara tun bayan hambarar da Bashir a shekarar 2019.
Jami’ai 13, da suka hada da tsohon shugaban diflomasiyya Ibrahim Ghandour da tsoffin mambobin jam’iyyar National Congress Party (NCP) da aka hambarar da su, an wanke su kuma kotu ta ba da umarnin a sake su cikin gaggawa,” in ji lauyansu Abdallah Derf.
Har yanzu masu gabatar da kara na iya daukaka kara, amma kotun "ba ta samu wata shaida da za ta yanke musu hukunci ba", in ji Mista Abdallah Derf, yayin da suke fuskantar tuhumar "bayar da kudaden ta'addanci" da kuma "dagula tsarin mulki".
A farkon shekarar, Mista Ghandour da wadanda ake tuhumarsa sun tafi yajin cin abinci inda suka bukaci a yanke musu hukunci da wuri.
A shekara ta 2019, sojoji sun kawo karshen mulkin Bashir na tsawon shekaru 30 sakamakon matsin lamba daga kan titi, inda suka share hanyar mika mulki ga farar hula da aka katse a watan Oktoba da hafsan sojin kasa, Janar Abdel Fattah al-Burhane ya yi.
Tun a wancan lokaci Sudan ta fada cikin rikicin siyasa mai tsanani, murkushe masu fafutuka na adawa da gwamnatin kasar ya yi sanadin mutuwar mutane kusan dari da kuma matsalar tattalin arziki da kudin kasar ke fama da shi.
Kungiyoyin rajin kare dimokradiyya sun sha zargin sabuwar gwamnatin mulkin soja karkashin jagorancin Janar Burhane, tsohon kwamandan sojojin Bashir, da neman sake shigar da jam’iyyar NCP da cibiyoyin sadarwa a cikin jihar.
Jam'iyyar da aka haramtawa duk wani aiki a Sudan a hukumance ta yi maraba da hukuncin a matsayin "damar sabuntawa ga kasar."
Leave a Reply