Najeriya Za Ta Rattaba Hannu Kan Yarjejeniyoyi 10 Da Portugal

Najeriya da Portugal za su rattaba hannu kan yarjejeniyoyin da suka kai 10 da kuma yarjejeniyar fahimtar juna a ziyarar da shugaban kasa Muhammadu Buhari ya kai a kasar dake Nahiyar  Turai.

Shugaba Buhari ya bayyana hakan ne a ranar Alhamis, a wani taron manema labarai na hadin gwiwa da shugaban kasar Portugal, Marcela Rebelo de Sousa.

Ya ce yarjejeniyoyin sun hada da:

”Kafa Cibiyar Nazarin Atlantic; Tafiya ta jirgin sama; Shawarar Siyasa; Horon Diflomasiya; Hadin gwiwar Al’adu; Haɓaka Zuba Jari; Haɗin gwiwar Rukunin Kasuwanci; Mata da Ci gaban Yara; Ci gaban Matasa da Wasanni da Haɗin gwiwar Tattalin Arziki na Zamani.

”Duniya tana cikin tsaka mai wuya.  Shawarwarin da muke ɗauka a matsayinmu na shugabanni na iya hada kai ko rarraba  duniya kamar yadda muka sani. Muna fuskantar kalubalen rayuwa tare da sauyin yanayi, rashin abinci, rikici, lafiya, da makamashi da sauransu.

“Muna kallon Portugal a matsayin kasa mai tasiri kuma abokiyar tarayya don taka muhimmiyar rawa wajen taimakawa  kokarin da ke yi na fitar duniya daga kangi.”

Bugu da kari, shugaban na Najeriyar ya ce kasashen biyu sun kuduri aniyar daukar dangantakarsu zuwa wani sabon mataki tare da cimma buri na hakika, yana mai jaddada bukatar kara karfafa alaka shekaru 46 bayan kulla huldar diplomasiyya.

Shugaban na Najeriya ya shaidawa manema labarai bayan ganawar kai tsaye da takwaransa na kasar Portugal da kuma wani gagarumin taron da aka yi tsakanin tawagogin kasar cewa, duk da alakar da ke tsakanin kasashen biyu, akwai bukatar a kara yin hadin gwiwa.

Tallafi Ga Africa

Shugaba Buhari ya godewa shugaban kasar Portugal bisa rawar da gwamnatinsa ta taka a lokacin da yake rike da mukamin shugaban kungiyar Tarayyar Turai, wajen samar da tallafin kudi ga kungiyar EU da IMF ga kasashen Afirka.

Shugaban na Najeriya ya kuma kara da cewa, a bana shekara ce ta cika shekaru 46 da kulla huldar jakadanci tsakanin kasashen biyu.

”Mun yi farin ciki da cewa za mu iya ƙidaya Portugal a matsayin abokiyar tarayya mai daraja kuma abin dogara. Muna da dabi’u iri ɗaya na dimokuradiyya, muna kuma sa ido don haɓakawa da faɗaɗa haɗin gwiwa a fannoni daban-daban a matakan bangarorin biyu da na bangarori daban-daban.”

Shugaban ya kara da cewa za a gudanar da taron kasuwanci da zuba jari na Najeriya da Portugal tare da halartar wakilai sama da 80 daga kamfanoni da hukumomi da kungiyoyi masu zaman kansu na Najeriya.

ABDULKARIM