Shugaban Jam’iyyar APC Na Kasa Ya Taya Dan Takarar Gwamnan Kogi Murna

Shugaban jam’iyyar APC na kasa Sanata Abdullahi Adamu, a ranar Laraba ya taya Hon. Ododo Ahmed Usman murna saboda lashe tikitin jam’iyyar na zaben gwamnan jihar Kogi.

Adamu ya bayyana haka ne a lokacin da dan takarar gwamna na jam’iyyar APC a jihar Kogi 2023 tare da Gwamna Yahaya Bello suka kai masa ziyarar ban girma a sakatariyar jam’iyyar dake Abuja.

Adamu ya bayyana jin dadinsa kan yadda jam’iyyar za ta samu nasara a zaben gwamnan jihar Kogi a watan Nuwamba 2023.

A martanin da ya mayar, dan takarar gwamna na jam’iyyar APC, Ododo, ya yi alkawarin cewa ba zai bata jam’iyyar da al’ummar jihar Kogi dadi ba.

Ya bayyana cewa zai dora kan gado da nasarorin da gwamnatin Yahaya Bello ta samu idan aka zabe shi.

“Ina son in gode muku da kuma shugabannin babbar jam’iyyarmu kan yadda aka gudanar da zaben fidda gwani na jam’iyyar a Kogi, wanda na yi nasara, da sauran su a jihohin Bayelsa da Imo, bi da bi.

“Na yi alkawarin tabbatar da nasarorin da gwamnatin Gwamna Yahaya Bello ta samu a yanzu, inda ya kara da cewa, dukkanin imaninmu ne cewa za mu lashe zaben gwamna na jam’iyyarmu a watan Nuwamba 2023. Ina so in yi amfani da wannan gata guda daya domin neman addu’o’in ku na uba yayin da muke kara kusanto da babban zabe,” in ji Ododo.

Muryar Najeriya ta rawaito cewa a ranar 14 ga Afrilu, 2023, kwamitin zaben fidda gwani na jam’iyyar APC reshen jihar Kogi ya bayyana Alhaji Ahmed Usman Ododo a matsayin wanda ya lashe zaben fidda gwani na gwamnan jihar Kogi, bayan ya samu kuri’u 78,704 inda ya doke sauran ‘yan takara a zaben.