“Gwamnatin NNPP Za Ta Yi Adalci Ga Kowa” – Mataimakin Gwamnan Kano

Mataimakin gwamnan jihar Kano, Kwamared Aminu Abdussalam Gwarzo, ya tabbatar wa mazauna tsohon birnin kasuwanci cewa gwamnatin jam’iyyar New Nigeria People’s Party (NNPP) a jihar za ta yi adalci ga kowa ba tare da la’akari da siyasa ba.

Gwarzo ya taya Gwamna Abba Kabir Yusuf murna; Shugaban jam’iyyar New Nigeria People’s Party na kasa, Sanata Rabi’u Musa Kwankwaso; da sauran musulmin jihar kan bikin Eid-el-Kabir, inda suka dage cewa “gwamnatinsu za ta yi adalci ga kowa.”

“Ina kira ga al’ummar jihar da su marawa gwamnatin Gwamna Kabir baya.

“Yayin da al’ummar Musulmi a fadin duniya ke gudanar da bukukuwan, lokaci ne da ya kamata a rika ba da kyauta ta hanyar raba wa marasa galihu da kuma masoyansu,” in ji Gwarzo a wata sanarwa da ya fitar ta hannun sakataren yada labaransa, Ibrahim Garba Shuaibu.

Gwarzo wanda kuma shi ne kwamishinan kananan hukumomi da masarautu, ya yi kira ga mabiya addinin Musulunci da su yi amfani da wannan biki wajen yi wa Najeriya addu’a, musamman kan tsaro da tattalin arziki.

Ladan Nasidi.